中環出更：高僧教落用心感受 陳勇買樓唔使睇風水
雖然唔係人人都信風水，但今時今日好多建築物、室內設計等都有加入風水嘅元素，唔少人買樓、租寫字樓時都會考慮埋風水好唔好先決定，但係新界社團聯會理事長陳勇就話其實唔使咁複雜喎。
陳勇早前出席世界觀音總會藝術大展時話，以前喺內地見過一個佛教高僧，嗰位高僧同佢講如果想買樓或者租寫字樓，其實唔使睇風水，只要去到嗰個單位入面，企喺中間合埋眼，如果覺得舒服就冇問題o架喇。佢之後都一直用呢個方法買樓租樓，甚至連出街食飯都會用呢招添。所以如果有日撞到佢，見佢合埋眼，就千祈唔好以為佢眼瞓，佢可能只係感受緊嗰個係唔係好地方啫。
現場展出包括《十八羅漢渡水圖》同《千手觀音》等唐卡，其實唐卡係藏語音譯，意即卷軸畫，係僧侶藝術家用顏料同其他工藝材料將各種圖案繪製喺錦緞、布帛、紙面上嘅卷軸畫。而唐卡通常用喺傳揚佛理教義、啟示信眾積善修德。世界觀音總會會長黃祉穎話，舉辦呢次藝術大展都係出於善心，希望社會上可以祥和一啲，少啲戾氣，佢仲話好嘅藝術展好值得做，未來只要有能力，一定會繼續舉辦咁話。
龍子明：宗教助紓壓
在場見到香港各界文化促進會榮譽會長龍子明，佢都認同宗教可以幫人紓緩壓力，甚至令人覺得幸福同有所依歸，絕對值得推崇。但一問之下，原來佢並冇宗教信仰。雖然佢講到宗教千百樣好，但佢認為信教都要睇時機，佢自己就未遇到一個合適嘅時機，冇得勉強，所以惟有多啲支持宗教活動，希望幫到多啲人喇。
卓妮