中環出更：鬧抄牌警遭圍插 區鎮樺「跪低」道歉
早幾日民主黨（白鴿黨）大埔區議員區鎮樺喺Facebook（Fb）專頁大鬧警察抄牌時冇禮貌，但就畀網民瘋狂洗板圍插，話佢違泊在先，仲想反咬警察冇禮抄牌，佢當時一度回應指「相信公眾會自有定論」。不過事隔幾日，睇怕係網民嘅攻勢太凌厲，留言區幾乎係一面倒指摘區，區不斷刪留言都搞唔掂，結果尋日終於喺Fb跪低道歉，但網民就唔多受落，叫佢引咎辭職。
區稱用詞過火 網民唔多受
區嘅Fb聲明首先就違泊道歉，話自己明白違泊係不當行為，仲一直支持警方就違泊問題執法，所以必定會承擔相關法律責任，並向公眾致歉。佢又承認喺本月二十五日嘅貼文用詞過火，同意今次處理事件嘅方法需要改善，再為自己嘅不當處理手法同事件引起嘅不便道歉。
雖然佢為事件道歉，似乎網民都唔多接受，網民喺佢嘅Fb留言，鬧佢嘅依然佔多數，質問佢同咗相關嘅警察道歉未，甚至叫佢引咎辭職，又抽秤佢講明會投訴嗰個警察，點止係用詞不當咁簡單。睇嚟區今次就算道歉都平息唔到網民嘅憤怒喎，點收科呢？
卓妮