政情：財爺唔識用盈餘 任志剛教阿茂整大個餅
香港人冇錢會頭痕，冇樓就更加頭痕，但其實有錢都唔一定唔頭痕！好似政府喺二○一七至一八年度嘅財政盈餘都爆晒燈，達一千三百八十億港元，財政司司長陳茂波（波叔）隨即畀人鬧爆係「守財奴」，有錢都唔識用，及後「跪低」派錢又派到亂晒龍，即使推出「樓市辣招」都無助壓低樓價，搞到民怨升得仲勁過樓市，睇怕波叔都好頭痕，但行政會議成員、金管局前總裁任志剛尋日就喺網誌上教路，就土地政策發表咗啲意見，唔知會否成為波叔嘅「救命草」呢？
倡大刀闊斧增土地供應
講到政府嘅龐大財政盈餘，任就認為龐大財政盈餘只會拖經濟發展嘅後腿，根本就唔需要咁多，例如大規模開發土地就係適當運用財政盈餘以投資香港未來嘅好方法，以資本方式注資到一間「特殊目的」公司（Special Purpose Vehicle），畀間公司獲明確授權負責香港嘅土地開發同供應，咁就有助落實政府土地供應政策嘅目標。
任同時亦建議「做大個餅」，直指只有政府擁有增加土地供應嘅能力，所以土地不足、樓價上升都只有政府可以解決，責無旁貸。任認為香港明顯係需要大規模填海，仲嫌東大嶼都會計劃都未必夠，可能要考慮填埋吐露港，實行一口氣解決香港未來幾十年嘅土地短缺問題。至於中短期措施，就應該重新規劃農地同部分郊野公園用地咁話。
其實唔單止土地供應，令樓價回落都係房屋政策嘅主打之一，任指政府須令樓價回到市民可負擔嘅水平，係一項重要嘅公眾利益，認為政府應採取大刀闊斧嘅方式，大幅增加住宅用地，務求將「供不應求」變成「有求必應」，仲要一直維持呢個狀況，咁就可以有效改變市場對住宅價格「只升不跌」嘅預期。
雖然任提咗好多建議，不過係唔係咁易執行又係另一回事，以填海為例，剩係馬料水填海已經好有爭議，如果連吐露港都填埋，相信反對聲音絕對唔細，所以到底係咪「講就天下無敵」，睇怕波叔都仲要自己諗清楚喇！