中環出更：糖尿病可傷眼方黃吉雯籲勿輕視
雖然愈嚟愈多人注重健康，但健康快車香港基金創會主席方黃吉雯就話仍然有人對糖尿病有誤解，以為係富貴病而有所忽略，仲警告糖尿病可以為眼睛帶來不可逆轉嘅傷害添！難怪「健康快車」防盲治盲嘅工作範疇已經唔再集中喺白內障上喇！
健康快車近年開始推廣同提高大眾對糖尿病視網膜病變（糖網病）嘅關注，並且走進社區提供免費糖網病眼底篩查，早前就進行啟動儀式。方黃吉雯話白內障病人接受手術後可以重見光明，糖網病卻係無形殺手，出現徵狀已經係晚期，且手術只能防惡化，故有需要及早搵出病人。
沈豪傑護眼 瞓前唔玩電話
篩查服務率先喺元朗區進行，元朗區議會主席沈豪傑當然有嚟撐場，而身為基金總理嘅葵青區議員李世隆、食物及衞生局副局長徐德義，以及財經事務及庫務局前常任秘書長區璟智都有到場支持。
李世隆就話家族無人有糖尿病史，所以唔太擔心會有糖網病問題。咪睇佢現時咁有分量嘅身形，佢話年輕時身形同體能都唔錯，仲試過報考過紀律部隊添，不過就衰喺第一關視力測試囉！而沈豪傑都係四眼仔一名，平日多佩戴隱形眼鏡，但開始有眼乾問題，估計遲多幾年戴唔到就要去矯視嘞！佢習慣隨身攜帶眼藥水，又會逼自己唔好喺瞓覺前玩電話，減少對眼睛嘅傷害。
至於區璟智左右眼分別有近視同遠視，度數相差大而望遠嘢時會較模糊，所以離遠見到人時就會打定招呼，但亦因為咁出現過蝦碌嘅情況，試過遠處有人向佢打招呼而早早作出回應，點知對方係同佢後面嘅人打招呼，認真搞笑！
卓妮