政情：追殺沙中線醜聞 立會鬧雙胞

田北辰先開會「飲頭啖湯」

有建制派議員形容今次會議安排好特別，因為立法會暑假休會期間好少會開特別會議，就算開，都好少「鬧雙胞」各自修行。該議員又話，雖然名義上鐵路事宜小組同交通事務委員會討論嘅議題略有分別，但共通點係都同沙中線工程醜聞有關，因此估計到時議員提問嘅內容都難免會有所重複。

另有建制派議員就話，雖然當日會議「鬧雙胞」，但相比之下，田二少主持嘅鐵路事宜小組先開會，加上係討論近期熱爆嘅沉降問題，會有「飲咗頭啖湯」嘅效果喎。