政情：八網難逃：鍾國斌暢遊自由城無王管
趁住暑假立法會休會，好多議員都會趁機去旅行充電，紡織及製衣界議員鍾國斌（Felix）都喺社交網站上載咗旅行相，其中一張相係着住黑色短袖衫、黑色長褲配對黑色鞋，一身全黑造型，加上單手插袋同挨住條柱，真係相當有型，佢仲留言話到訪嘅地方「仲自由過自由黨」喎，到底佢去咗邊呢？
原來Felix去咗丹麥首都哥本哈根嘅Christiania（自由城），佢話成日睇王宮、博物館等睇到夠皮，所以唔再去啲傳統地方，而自由城係無王管地區，啲人喺入面想做乜就做乜，仲自由過自由黨喎！其實該黨黨員近日就侍產假議題各自表述意見，已經相當自由喇喎。佢又話，哥本哈根天氣都有成三十度，佢就打孖上咁歎啤酒，大讚係最好，夠晒透心涼！