政情：關注禾花雀瀕危 高永文落田插秧
食物及衞生局前局長高永文一直被指係建制派推舉出戰立法會九龍西補選嘅合適人選，但佢本月初已經表明唔會參選。呢頭話唔參選，嗰頭佢就去咗塱原濕地插秧種米。高今年先六十一歲，唔通佢咁快就想告老歸田做農夫？
望秋收吸引留港棲息
高永文落田插秧，並唔係諗定退休做農夫，只係作為香港觀鳥會嘅禾花雀保育大使，同咗一班義工去插秧，希望可以喺十一月秋收嘅時候，吸引到多啲禾花雀嚟香港棲息啫。高一向熱愛觀鳥，為咗禾花雀真係不遺餘力，事關佢喺烈日當空之下落田，搞到大汗疊細汗、成手都係泥，真係唔話得。
高話，去年禾花雀已經成為極度瀕危品種，佢哋一直都好關注禾花雀嘅情況，發現每年來港棲息嘅禾花雀數目下降，所以就希望透過今次插秧活動吸引禾花雀，亦都呼籲要保育鄉郊同支持本地農業發展，覺得活動好有意義。