政情：區諾軒擲公帑助眾志回魂立會

多名領導層獲聘任議員助理

區諾軒喺今年三月立法會香港島補選中，以「Plan B」姿態代替被DQ嘅周庭出戰並成功當選，而選舉期間，眾志都出力助選，所以之後都順理成章成為區諾軒嘅議員助理（議助），可以喺立法會大樓內自由游走，包括多名眾志嘅現任或前任領導層。

區當選後可以向立法會秘書處申領辦事處營運開支，當中包括職員薪酬等開支。由區嘅申領可見，佢早喺今年三月廿一日聘請周庭，而喺今年四月一日則以邀請方式聘請羅冠聰，連眾志秘書長黃之鋒及已退出眾志嘅前副主席袁嘉蔚都有份。另外，知名度唔高嘅眾志常委梁延豐、副秘書長陳珏軒及前副秘書長郭熙堯亦都獲區垂青。

羅冠聰最高薪 黃之鋒周庭兼職

七名與眾志有關係嘅議助之中，以短暫出任立法會議員嘅羅冠聰月薪最高，佢以二萬二千元獲聘任全職政策顧問；陳珏軒則以一萬六千元月薪出任全職政策研究員。而袁嘉蔚就以一萬四千元出任全職社區幹事；梁延豐及郭熙堯就同樣以一萬四千元，分別獲聘為全職媒體主任和全職研究及行政助理。

至於黃之鋒同周庭就以兼職身份幫助區諾軒，分別以月薪五千元出任兼職社區幹事及兼職政策研究員。計計埋埋，區諾軒每月就花上九萬元公帑畀上述七名眾志現任或前任領導層，仲未計算其他普通眾志成員嘅議助薪金，即單是議助薪酬，預計每年花逾百萬公帑。

另外，前學聯副秘書長岑敖暉早就擔任議員朱凱廸嘅研究幹事，但當時月薪連八千元都冇，但現時佢已經加人工去到一萬三千元喇。而今年立法會九龍西補選落敗嘅前議員姚松炎，亦都喺今年五月起獲朱凱廸聘請出任研究幹事，但月薪就只得一萬元，同以前做議員月薪九萬六千多元，真係蚊髀同牛髀。不過，姚在選舉中以「朱凱廸模式」參選，而朱更被指要對姚落敗負上一定責任，唔知佢請姚做研究，係咪為咗補償呢？