中環出更：塔林古城探朋友林黃寧艷：愛回家
愛沙尼亞共和國駐港名譽領事林建康太太林黃寧艷（Lianne）同契妹、保良局總理鄧宣宏雁（Emily）近幾年經常一齊坐郵輪歎世界，呢個暑假佢哋兩家人就去咗愛沙尼亞、俄羅斯、芬蘭及瑞典等歐洲國家。Lianne話去到愛沙尼亞首都塔林，感覺好似「回老家」，期間帶好友周圍欣賞古城名勝、歎美食兼探朋友，開心到極。
今次Lianne一家先出發去倫敦屋企小住幾日，然後同Emily一家喺德國柏林會合。Lianne話，由於老公做咗愛沙尼亞名譽領事多年，間中都會陪佢到塔林，今次帶埋Emily一家人去，感覺好似半個主人家咁。塔林位於芬蘭首都赫爾辛基對岸，環境優美，佢哋仲去咗被中世紀古建築物環繞嘅市集行吓，感受古城濃厚氣氛。
鄧鉅明讚當地導遊普通話叻
跟住一行人又去咗俄羅斯聖彼得堡，當地充滿特色嘅王宮、古色古香嘅建築物更係令人神往。Emily仲發現一件有趣嘅事，話說佢哋請咗一位識講普通話嘅導遊，估唔到呢位女導遊雖然係土生土長嘅當地人，但普通話流利程度就媲美北京人，連Emily老公鄧鉅明都話人哋講得好過自己。
Emily話，今次出發前仲發生咗一段小插曲，令佢好大感觸。事關佢突然胃痛要入院，仲留院咗幾日做詳細檢查，好彩冇咩事，最終可以龍精虎猛咁去旅行。佢話可能過去一段時間忙於做公職、慈善同生意，工作太緊張兼夜瞓，搞到身體唔舒服。依家佢會限制自己夜晚十一點前熄手機，避免成日去篤手機而影響睡眠質素喎。
卓妮