政情：銀髮族留守職場 梁智鴻話要調整崗位
點樣為之老有所為？從未言休嘅安老事務委員會前主席梁智鴻（金刀梁）就話政府為確保勞動力，鼓勵生育以防將來年輕人口不足，但其實目前嘅銀髮族一般健康狀況都唔錯，應該要促使長者繼續喺職場上有所貢獻。但要成功推動長者重投職場或延後退休年齡，銀髮僱員嘅工作崗位就可能要調整一下。
要明白「長江後浪推前浪」
金刀梁話銀髮僱員普遍具豐富經驗同閱歷，若因年齡界線就要退出職場未免可惜。但為免「阻住後生上位」，銀髮員工宜從管理層淡出，改喺前線崗位繼續發揮所長。佢以醫護界為例，年長嘅醫生可以唔做高層，一樣可以喺病房照顧病人。
隨住崗位改變，薪酬亦難免有所調整，但佢話大家要明白「長江後浪推前浪」，每個人或遲或早都要交棒畀下一代，職場上嘅銀髮僱員同老闆都要有呢個心理準備至得喎。