政情：親提譴責動議 葉劉叫錯「許智威」
喺立法會強搶保安局行政主任手機嘅白鴿黨議員許智峯（峯鴿），事後被鬧爆，臭名遠播，但喺尋日嘅立法會人事編制小組委員會會議上，竟然畀人叫錯名，仲要係對佢提出譴責動議嘅議員葉劉淑儀叫錯添！
峯鴿尷尬 葉劉道歉
喺今年四月爆出「峯搶手機」事件後，峯鴿除咗面對警方刑事調查，喺議會內亦受到彈劾，由葉劉提出譴責動議。但事隔個多月，葉劉尋日主持會議時竟然將許智峯叫錯做「許智威」，仲唔發現自己講錯，搞到峯鴿尷尷尬尬話「我個名許智峯」，最後再加多兩下突兀笑聲遮醜。
其實葉劉提出譴責後仲叫錯峯鴿名，聽落都幾離奇，但峯鴿當時緊接議員范國威發言，再加上葉劉已長時間主持會議，可能先因而叫錯名。之後葉劉就向佢道歉，峯鴿亦繼續就環境保護署開設職位發言，認為鄉郊保育辦公室涉及人文價值、傳統文化同風俗等，質疑點解無咗非物質文化遺產辦事處參與，而會議一共通過咗六個項目，將交由財務委員會審議。