政情：法案委員走清光 主席一個人開會

有議員折返如抓救命草

呢個法案委員會只有七名委員，開會唔齊人，連選主席時都冇爭議，Kenneth獲提名做主席後，建制派黃定光都搶住和議，之後議員走下一個，走下又一個，得番一個議員多次問問題，連呢位議員都走埋後，Kenneth一人力挽狂瀾咁問，到需要逐條審議時，終於忍唔住暫停會議，叫秘書處搵人返嚟。

一早已問咗問題嘅郭偉強第一個返嚟，財經事務及庫務局副秘書長黎志華即刻話「靠晒你啦郭議員，需要一位議員幫手逐條審議」，郭反問「爭啲咩呢？」到教育界葉建源入嚟時，郭就同葉講「叫人逐條審議喎，主席堅持呀！」二人距離主席個位比較遠，唔知Kenneth聽唔聽到，佢只係話「唔該晒」。郭之後黑晒面，逗留約十分鐘後就離開。