政情：鬧交王麥美娟 畀爸爸一句KO
工聯會（工記）立法會議員麥美娟（Alice）曾自稱「工記鬧交王」，畀人話「死都拗番生」。不過呢個世界天外有天，人外有人，Alice自爆話其實佢經常被人「一句KO」。唔知邊個咁厲害，連「鬧交王」都可以秒殺呢？
邀回鄉 遭反客為主
原來KO Alice嘅人正正就係佢爸爸。Alice話，自己經常畀爸爸「一句KO」，試過想趁假期陪爸爸回鄉，點知爸爸一句︰「你想返我咪陪你返囉！」成功反客為主；又有一次，Alice教訓姪女，叫姪女唔好入廚房撳壞洗衣機，點知爸爸就話：「依家啲洗衣機邊有咁易壞o架！」搞到Alice完全反駁唔到。
雖然Alice成日畀爸爸「一句KO」，但佢其實樂在其中，因為爸爸年事已高，仲有能力「一句KO」佢，即係爸爸依然身體健康、頭腦清醒喎。唔怪得佢鬧交咁叻啦，原來佢爸爸今時今日都「訓練」緊佢，真係想唔叻都難喇。