政情:泛民疑阻高鐵附例 建制冧友防範

立法會大會上星期喺爭議聲中通過《廣深港高鐵(一地兩檢)條例草案》,喺高鐵西九龍站實施一地兩檢已塵埃落定,但民主派對「高鐵」二字仍然敏感。立法會一個關於西九龍站啟用嘅附屬法例小組委員會聽日首次開會,將會選出小組委員會主席。過往呢類小組委員會通常只有寥寥數人加入,力反高鐵一地兩檢嘅民主派今次疑似玩嘢,竟有十四人加入,搞到建制派都要冧友,最後小組委員會竟有四十人加入。咁多人開會,一人一句都真係分分鐘拖慢晒會議效率喇!

立法會與廣深港高速鐵路西九龍站的啟用相關並於憲報刊登的附屬法例小組委員會聽日開會,會議要處理嘅包括《二○一八年入境(羈留地點)(修訂)令》、《二○一八年入境事務隊(指定地方)(修訂)令》以及《二○一八年實體貨幣及不記名可轉讓票據跨境流動條例(修訂附表 一)(第二號)公告》,當中最主要就係修例以指明喺西九龍站港方口岸區加入畀入境事務處用作羈留所嘅地方。

14民主派加入委員會

舊年就港珠澳大橋通車,立法會都有成立小組委員會處理上述事宜,當時只有十一人加入,僅開一次會議就已完成相關工作。惟今次有關高鐵嘅附屬法例小組委員會中,民主派身兼一地兩檢關注組召集人嘅公民黨陳淑莊(Tanya),同經常拉布嘅議會陣線朱凱廸等,已經有十四人加入。唔通民主派依然死心不息,想阻西九龍站啟用同高鐵通車﹖

據了解,負責嘅保安局官員早已嚴陣以待,動員建制派加入小組委員會,結果建制派共有廿六人加入,包括當局屬意任小組委員會主席嘅立法會保安事務委員會主席、民建聯(民記)陳克勤同埋有法律背景兼係建制派「重炮手」嘅議員何君堯、謝偉俊等,人數比立法會非建制派議員總數仲多。

建制派:希望唔好拉布

Tanya聲稱,因為小組委員會處理嘅係同高鐵相關事宜,所以都要「樣樣小心檢視」,否認想玩突襲。克勤就承認,因為怕民主派玩嘢,所以建制派都唔敢掉以輕心,直言「民記半個黨都入咗(小組委員會)」,又話小組委員會處理嘅事宜同一地兩檢冇關,係冇爭議性嘅,希望民主派唔好拉布咁話。

牌面睇,建制派咁疊友,民主派應該玩唔出乜嘢花樣,之但係唔怕一萬,最怕萬一,建制派都要醒醒定定先得。

第一手消息請下載on.cc東網iPhone/iPad/Android/Windows Phone Apps