錯！錯！錯！財政司司長陳茂波（波叔）連環估錯盈餘，簡直係大錯特錯，仲破埋紀錄添！港府尋日公布一七至一八年度財務狀況臨時數字，最終錄得一千四百八十九億元盈餘，比起波叔喺二月底修訂嘅一千三百八十億元，多咗一百零九億元，更比起原預算一百六十四億元盈餘多出成八倍。近年嘅預算案錯估形勢大家都習以為常，不過要好似波叔咁不斷估錯數兼且創紀錄，真係「難上加難」，唔通連財爺都要返學再培訓過先至得？
