政情：三委員會嗌點人數 議會陣線策略失敗
立法會尋日下午同時有三個委員會開會，下午五點半左右，議會陣線三名議員分別喺三個唔同嘅委員會「發難」，范國威率先喺《廣深港高鐵（一地兩檢）條例草案》委員會提出點算法定人數，跟住輪到陳志全喺司法及法律事務委員會提出點人，最後由區諾軒喺政制事務委員會點人。結果有驚無險，三個委員會都夠人開會，不致流會。
流會算盤打唔響
據了解，同時喺三個委員會提出點算法定人數係議會陣線事前討論嘅策略，可惜最後因為建制派有足夠議員喺立法會，流會嘅如意算盤先打唔響。
此外，政制事務委員會尋日舉行公聽會，當區諾軒提出點算法定人數時，委員會主席廖長江就警告，第二節公聽會就嚟完，如果依家流會嘅話，第三節就要變成書面遞交意見書，強調唔會再搞公聽會喎！好彩最後冇事啫。