政情：譚文豪投訴黎穎瑜 意圖追蹤議員
政府以「狗仔隊」觀察議員係咪喺立法會開會嘅做法備受爭議。立法會財務委員會上周五嘅議程中，包括審議西九文化區基建工程，咁啱當晚係公民黨黨慶，公民黨立法會議員譚文豪尋日爆料話，民政事務局政治助理黎穎瑜當日曾要求佢提供該黨黨慶流程，以便得知議員何時會出席，而唔喺會議室開會。佢批評黎穎瑜做法「好過分及非常惡劣」，將會去信政務司司長張建宗投訴。
譚文豪指，當日無邀請黎穎瑜出席黨慶，批評佢要求提供流程嘅做法，係公然意圖掌握議員喺議會外嘅行蹤，唔符合張建宗早前形容嘅「低調觀察」。佢話該做法極不尊重議員，議員係咪出席會議應由選民監察，不容政府監控，稱自己唔會配合政府做「狗仔隊」。當時譚文豪亦拒絕提供黨慶流程，叫對方自行詢問各議員何時會離開會議室。
黎：相信只係一場誤會
黎穎瑜回覆指，當時只想掌握公民黨黨慶時間，並無要求對方提供名單，亦非要追蹤議員，相信只係一場誤會。黎穎瑜曾被爆開WhatsApp群組加入全部建制派議員，提醒佢哋開會及投票，唔少建制派不滿其做法而離開群組。