政情：行會出席率 劉業強最低得73%
行政會議決定本港多項重要政策，特首辦喺回覆立法會議員有關財政預算案嘅書面質詢時踢爆，截至去年底，本身係立法會議員、屯門區議員及鄉議局主席嘅行政會議成員劉業強，喺行會嘅出席率只有七成三，僅出席其中十六次會議，係行會非官守成員之中最低。
史美倫亦僅得77%
截至去年底，本屆行會共舉行二十二次會議，其中有兩人嘅出席率低於八成，除咗劉業強出席率係最低外，第二低嘅係啱啱出任港交所主席嘅史美倫，出席率僅為七成七。特首辦解釋，行會非官守議員或因出席其他與公職有關嘅會議或活動，而未能出席行會。
至於身兼立法會議員、中西區區議員嘅行會成員張國鈞嘅出席率係九成半，其他身兼行會及立法會嘅「雙料」議員方面，張宇人、廖長江同葉劉淑儀嘅出席率都係九成半，而林健鋒嘅出席率就係九成一。