政情：三宗罪峯鴿犯眾憎嫻姐炮轟恰女人
外號「峯鴿」嘅民主黨（白鴿黨）立法會議員許智峯強搶女官員手機事件繼續發酵，繼曾任議員長達四分一世紀嘅白鴿黨前主席劉慧卿炮轟峯鴿唔適任議員及留在黨內，來自建制派嘅前資深議員陳婉嫻（嫻姐）尋日亦狠批峯鴿「三宗罪」，包括唔應該將前線打工仔女作為出氣袋、欺負女性體形及力量不足，以及冇資格成為立法者；另有前高官更形容峯鴿猶如「活死人」，建議峯鴿立即辭職避免拖累其他泛民黨派。連日遭各界狠批嘅峯鴿，究竟會否知所進退，諗吓自己政治前途何去何從？
峯搶手機事件於上周二發生，至今仍未平息，連日成為政界熱話，白鴿黨主席胡志偉亦要頻頻現身撲火，但被學者質疑言論有由強硬轉為軟化嘅迹象。身為婦女事務委員會主席嘅嫻姐尋日加入戰團，佢於報章撰文狠批峯鴿，話從勞工角度出發，不論許智峯對政府同官員有何不滿，都唔能夠將前線嘅打工仔女作為出氣袋。
王永平指峯如「活死人」
嫻姐續批評，峯鴿欺負女性體形同力量不足，「心態上猶如封建年代之迂腐，男權大晒，女性可欺可凌，令人討厭」，佢認為峯鴿已冇資格成為立法者。對於泛民重提建制派議員過往嘅錯漏，嫻姐直斥呢個係狡辯同企圖轉移視線。
前公務員事務局局長王永平亦於報章撰文，形容峯鴿已猶如「活死人」，白鴿黨繼續保對方只會拖累其他泛民黨派。王續指，即使喺泛民力保下，峯鴿可逃過建制派喺立法會提出譴責動議保住議席，對方仍要面對包括盜竊、傷人及不誠實使用電腦等刑事調查，令白鴿黨喺市民心中形象不斷受損，直至無可收拾，「這個結局對民主黨是災難」。
王認為，白鴿黨高層可向峯鴿曉以大義，建議峯鴿立即辭職，以示對事件負責，咁樣白鴿黨及峯鴿都可擺脫「活死人」包袱，重新出發。
潛水後現身 乜都唔講
至於搶手機事件主角峯鴿，自從上周四鞠躬道歉認衰後就潛水，未有再公開回應事件，直到尋日，峯鴿終於現身出席立法會多個事務委員會，一度與正被譴責動議狙擊嘅熱血公民鄭松泰為鄰。當離開時被問及各界對峯搶手機嘅批評，峯鴿僅稱「唔好意思，唔方便講」。不過正所謂「避得一時，唔避得一世」，若然身為議員唔可以暢所欲言，猶如被廢武功一樣，唔知峯鴿會否甘心如此呢？