中環出更：細個瞓古董床莊家彬大個儲畫
香港成日被人話係文化沙漠，但其實都有唔少港人鍾意收藏藝術品。香港菁英會主席莊家彬早前出席一個陶瓷藝術收藏展時，講起佢家人都收藏唔少古董，除咗畫及瓷器，仲有傢俬添，擺到成屋都係，就連佢細個瞓嘅床都係古董喎。咦？小朋友都鍾意喺梳化或床上紮紮跳，唔通佢就咁喺古董上面跳？莊家彬就笑稱唔係，事關細個冇咁多古董傢俬，佢大個啲屋企先慢慢多咗古董咁話。
莊家彬話，家人收藏嘅古董多到要搵專門嘅房同埋倉擺放，咁佢有冇試過整跌收藏品呢？佢就話「梗係唔會喇，跌爛咗賠唔起呀！」問佢係咪都有好大興趣收藏古董，佢就笑指搵到錢先啦。查實佢都有收藏當代藝術嘅畫，因為入門比較簡單，又可以當擺設。從事服裝生意嘅羅正杰同樣鍾意當代藝術，佢話去旅行時特別鍾意睇當地特色建築。
馬浩文收藏品升值
同場仲有立法會議員馬逢國、港協暨奧委會會長霍震霆及副會長貝鈞奇、廣西社團總會創會會長譚錦球及義工聯盟常務副主席馬浩文等人。講起收藏藝術品，醉心收藏陶瓷嘅珠海社團總會會長鄺美雲就話，特別欣賞景德鎮連路燈都係用陶瓷造，覺得相當有文化氣息。
馬浩文就話，試過喺越南買咗啲畫，好靚又唔貴，後來有某啲國家政要到越南，都買咗同一個畫家嘅畫，該畫家嘅身價隨即被煲起，自己所買嘅作品亦都因此升值。不過佢話，除非已研究多年，否則就唔建議純粹為投資而買藝術品，因為流通慢，唔似得股票等等投資產品。
卓妮