政情:網絡犯罪猖獗 立會再提醒議員小心

自去年出現嘅WannaCry勒索軟件肆虐全球後,公眾對勒索軟件嘅戒備已有所增加,亦都多加關注網絡安全。

或因議員WhatsApp曾出事

立法會秘書處尋日就再次向全體議員及職員發電郵,提醒要注意來歷不明嘅電郵及電腦上網安全,未知重發提示同近期發生嘅WhatsApp騙案有冇關係呢?

呢封溫馨提示電郵已經係今年四個月內第二次重發,咁啱近期WhatsApp騙案猖獗,連立法會議員都因誤開有毒連結而不幸中招,令人聯想到秘書處如此貼心去作出有關提醒喇!

秘書處所重發嘅電郵,係就住處理來歷不明電郵同電腦上網安全方面畀意見,包括唔應該點擊可疑或濫發電郵所載嘅連結、唔好安裝或使用來歷不明嘅軟件,又提醒有電腦病毒會偽裝成歡迎卡片、廣告或訊息等添!雖然唔少提醒都係老生常談,但秘書處多作提示都並非壞事,希望能夠提高議員嘅戒備喇!

第一手消息請下載on.cc東網iPhone/iPad/Android/Windows Phone Apps