政情:「貴金屬女王」黃曉君靠研發實力抗危機

博愛醫院總理黃曉君(Kelly)加入博愛大家庭已經六年,佢望落弱質纖纖,平時唔多嘢講,原來佢喺貴金屬行業幾乎無人不識,集團旗下單單係貴金屬化工產品業務年銷售額就超過一百億元,全中國最大,名副其實係「貴金屬女王」。Kelly笑笑口話,依家集團喺山東同廣東江門都有基地,山東仲有金礦添。不過佢最上心嘅似乎係研發中心,仲話經歷咗幾次經濟危機,全靠研發實力先至頂得住咋!

早前博愛永遠顧問陳李妮(Lily)同Kelly出現喺一個飯敍上,Lily笑稱識對方咁耐,唔講都唔知佢係工業界「女漢子」。

笑指研究人員多數生女

Kelly講起研發中心特別多話題,仲笑笑口話,喺實驗室工作嘅研究人員好多都生女,可能同工作環境多酸性嘢有關,所以更加覺得佢哋好偉大。

Kelly仲話,近年工業走下坡,喺內地設廠嘅傳統工業一批批咁出走,好彩佢重視研發先至企得穩。所以佢認為港府應該鼓勵企業重視研發,唔好太倚賴金融業,咁先至抵受得住經濟危機衝擊咁話。

第一手消息請下載on.cc東網iPhone/iPad/Android/Windows Phone Apps