政情:姚松炎 陳家珮拉票當老奉 辣(興)樁腳

立法會四個議席補選已成定局,兩派樁腳賽後檢討時,就大數落敗嘅民主派九龍西參選人姚松炎同建制派香港島參選人陳家珮嘅不是。據知,姚松炎搵泛民拍片拉票,但係拍咗又唔用;陳家珮就連去拜票都懶得做,選完之後更加多謝都無句。唔少建制派人士慨嘆,其實只係畀面新民黨主席葉劉淑儀,先至投陳家珮一票咋!兩人連咁基本嘅禮數都唔識做,仲想學人玩立法會直選,睇嚟要上番幾堂直選BB班先得喇!

搵完人幫手拍片 姚唔吼

姚松炎被寄予厚望出戰九龍西,點知地區工作做唔足,又少同地區人士溝通,加上只迷信「朱凱廸式」拉票,搞到最終落敗收場。雖然選舉後佢已經話會承擔所有責任,但有泛民中人就埋怨,選舉時叫人幫手拍片做宣傳,又搵嚟九龍西地區人士幫忙出面,誰不知最後都無出過,激氣到話「早知唔幫佢拍喇!」又有泛民中人話,幫姚松炎做咗一批宣傳品,最後都係無用到,但佢自己就用埋啲似係被人惡搞嘅醜樣橫額,真係畀佢激死!

陳拜票懶去 妄想要戶口簿

同樣高票落敗嘅陳家珮亦唔好得幾多,輸咗仲要被地區人士唾棄,直言「唔係畀面葉太(葉劉淑儀)都唔會幫佢呀!」選舉前已有地區聲音不滿陳家珮無去拜票「打招呼」,當時陳家珮仲死撐話要等埋葉劉,殊不知選舉後,除咗地區人士外,更有社團組織成員都話選前無見過陳家珮去拜票。仲有地區人士因為畀面葉劉落力拉票,令陳家珮喺部分票站領先對手區諾軒數百票,點知選舉後只收過葉劉講多謝,陳家珮就影都唔見,佢非常氣憤話「下次陳家珮再出嚟都唔會幫!」

不單止禮數欠奉,有建制派人士更爆出,陳家珮所屬嘅新民黨,竟然有人老實不客氣開聲問地區人士攞「戶口簿」(支持者聯絡方法)去拉票,唔識佢嘅,真係以為佢新嚟,「戶口簿」如身家財產,可以立亂畀嘅咩?加上佢安排宣傳品又「立立亂」,真係唔知點樣幫。又有人話,日日返港島工作,整個選舉期都未見過陳家珮,反而見過區諾軒,直言輸都係有理由喎。

第一手消息請下載on.cc東網iPhone/iPad/Android/Windows Phone Apps