中環出更：王淑慈想追B難夾生肖好頭痕

浙聯青委早前舉行一場新春晚宴講座，搵精通術數及畫畫嘅香港風水畫藝會會長袁志明解說流年，並從風水角度賞析畫作。Sukey為咗籌備呢個活動，聽咗唔少同風水流年相關嘅知識，難怪佢覺得十五十六喇！

詹嘉莉過年習慣去拜山

當晚出席講座嘅仲有青委前主席麥超傑、常務副主席詹嘉莉（Kelly）及副主席柯琼浩等人，浙聯會長詹耀良夫婦、秘書長顧東華及太太Helen都喺度。新正頭，最緊要講好意頭，不過Kelly就話過年期間屋企人習慣去拜山，今年都唔例外。

形象顧問關馬麗怡（左）介紹麥超傑（右）同袁志明（中）相識，促成舉辦今次講座美事。

詹嘉莉（左）同Helen（中）及柯琼浩（右）老友鬼鬼。

點解新年流流去拜山？家族有「手套大王」稱號嘅Kelly笑笑口解畫話，佢哋一到冬天就得閒啲，所以會去拜山，唔使喺清明節或重陽節同人哋逼。Kelly嘅叔父詹耀良都有去，佢笑稱百無禁忌，相信先人會保佑孝子賢孫嘅。

詹耀良仲提起今年將慶祝浙聯成立廿周年，重頭活動除咗大型晚宴之外，仲會趁暑假舉行千人高鐵團，帶一千名香港青少年去深圳坐高鐵北上浙江，希望增進港青對內地嘅了解。

卓妮