中環出更：張宇人割膽 感悟生仔之痛
身兼行政會議成員嘅立法會議員張宇人，早前自爆會接受微創手術割膽，原來佢已經完成手術，但就話完全感受到女士生小朋友嘅痛喎。明明做微創手術傷口比開刀細喎，唔通第一次接受手術嘅佢咁怕痛？
膽石太大 微創手術變開刀
張宇人透露，原先的確進行微創手術，但最終都要改用傳統開刀去進行手術，所以身上就多咗一個長三吋嘅傷口囉！佢仲講笑指可能個膽太多毛，先要改變手術方案，但最後就透露，因為粒膽石太大，更令到附近出現發炎情況，所以唔改開刀唔得。
佢又話復原情況唔錯，但手術後咳嗽時傷口好痛，而經過幾日嘅研究，發現咳時按住傷口能夠減輕痛楚。不過，打乞嚏先係最痛，佢話好彩手術至今只係打過一次乞嚏咋！
張宇人手術後冇耐就已經出席晚宴活動，但佢就話太太好緊張，所以到場只係表達支持，唔會食嘢嘞，仲話會提早返屋企，飲太太炮製嘅靚湯添！屋企人咁呵護備至，難怪佢復原得咁快喇！
卓妮