政情：有相為證：梁志祥神秘禮物贈柯創盛 同事叫苦
立法會議員柯創盛（柯仔）喺本周二收到由黨友梁志祥送嚟嘅包裹，柯仔未打開已經非常開心，但係佢辦公室部分同事就叫苦連天，大叫救命。究竟呢份神秘禮物係乜嘢嚟？
柯仔收禮當日喺社交網站上載咗一幅包裹相，相中嘅膠袋上貼有「梁志祥送給柯創盛議員」字眼，並留言叫人估包裹入面係乜嘢？有網民認為係頸巾或背心等衣物，亦有人估係臘鴨或陳皮，結果統統都錯晒。柯仔向我哋開古，原來禮物係有果王之稱嘅榴槤，又話自己好鍾意食榴槤，金枕頭同貓山王等品種全部食得津津有味，又話可以獨自「消滅」成個榴槤，而梁志祥得知柯仔口味，所以特登叫馬來西亞朋友送咗一個當地特選榴槤畀佢。
馬國特選榴槤 一晚食六件
不過，唔係人人都接受到榴槤嘅獨特味道，柯仔辦公室部分職員就頂唔順呢浸「臭味」投降，搞到柯仔要急急腳將個榴槤轉移上車。但係榴槤始終燥熱，結果柯仔當晚食咗六件，之後就開始喉嚨痛。梁志祥就建議食完榴槤可飲番杯茶下火，又踢爆除咗柯仔外，另一黨友葛珮帆亦都係榴槤迷呢。
