中環出更：局長形象卸唔甩 高永文當街收投訴
食物及衞生局前局長、骨科醫生高永文舊年中離開「熱廚房」，做番醫生老本行開診所，近月更開始再執刀為病人做手術。佢尋日出席深水埗區議員鄭泳舜搞嘅「與你同跑」嘅活動時，竟然有街坊上前同「局長」投訴醫管局！睇怕想卸都卸唔甩個局長形象嘞！
好多人問「點解唔繼續做」
不過問番係咪經常收投訴，高永文就話今次喺卸任後首次收投訴，雖則不在其位，都有請佢嘅前政治助理陳凱欣幫忙抄低資料，嘗試跟進。佢仲笑稱，卸任後最多人追問佢點解唔繼續做？
適逢尋日係渣打馬拉松，往年有參加比賽嘅高永文就慨嘆今年錯過比賽，因為今早有另一活動要去做主禮，另外就係大會無咗邀請賽，變咗親子賽。咁會唔會同兩個仔一齊參賽呀？佢就話兩個仔都大啦，「我想親都無人同我親」，而且兩個仔依家喺公立醫院「On Call 36緊」，唔得閒理佢喎。
另外，有市民就向高永文提問，指作為九龍西嘅選民，「有咩原因要選立法會議員？」睇嚟廣大市民真係好愛戴高永文，想佢由局長轉去做議員，唔知佢會唔會考慮下屆出戰醫學界呢？
卓妮