中環出更：細個焗「住」捱 潘國華憶兒時木屋
香港嘅住屋問題愈嚟愈嚴重，唔少基層都住喺劏房等惡劣嘅居住環境。多名政界人士尋日喺馬場出席「樂善堂盃2018」時，就講起小時候捱過艱苦嘅居住環境。九龍城區議會主席潘國華話細個住木屋，其後上咗樓都要同鄰舍共用廁所，至於區議員何顯明就話結婚後都係住鐵皮頂嘅劏房，仲試過供樓捱廿二厘息添！聽落，條路真係行得唔容易呀！
潘國華話七兄弟姊妹一齊住粉嶺嘅木屋，打風試過天窗被揭起，自己就唔識驚，仲會好開心屋企水浸可以玩水，但爸媽要清理就好辛苦嘞，到十八歲先上樓，安置咗去山谷道邨，廁所都係公用，但當年嘅治安較好，依家落區見到有啲劏房環境好差，唔止地方細，住戶又會丟垃圾落天井，又會有老鼠，又會爆渠，覺得劏房戶真係好辛苦。
何顯明當年結婚住劏房
何顯明就話同太太結婚後都係住鐵皮頂嘅劏房，第一次出糧就拿拿臨買部冷氣，之後再慢慢儲錢買樓，佢亦覺得依家樓價同薪金嘅差距較以前大好多，都有提醒個仔要適時「上車」。
九龍樂善堂副主席陳李玉佩同老公陳達華細個都有捱過，陳達華話細個屋企連電視機都冇，而陳太話以前喺東九龍嘅屋邨長大，屋企有六兄弟姊妹，都住得好擠迫，依家時代進步咗，都想幫基層小朋友改善生活環境，令佢哋有多啲空間，生活得健康啲同環境衞生啲。
九龍樂善堂主席郭予宏話舊年推出社會房屋共享計劃，收到五百個申請，其後計分選出一百個住戶，再做家訪，最終揀出二十個家庭入住，其餘八十個家庭就變成輪候名單，佢話好想加碼幫到多啲基層家庭，希望再有業主捐出單位。九龍樂善堂總幹事劉愛詩就話曾有十多個愛心業主接觸佢哋，但考慮到要符合消防條例等，暫時未見到有適合嘅單位，希望再有善心人幫手，等佢哋再有機會物色到適合嘅單位啦！
卓妮