政情：鬧爆撥款慢 張建宗「兇」停工

4‧1死線 警告9000項目面臨停工

張建宗尋日喺網誌上力數依家工務小組同財委會嘅撥款進度慢。佢話依家工務小組其中一個待議議程，係二○一八至二○一九年度嘅基本工程儲備基金整體撥款嘅申請，當中涉及上萬個項目，總額接近一百二十五億元。跟住佢仲趁機兇啲議員，話如果財委會喺一八至一九財政年度開始前，即係今年四月一日前未通過該筆撥款，到時約九千個進行緊嘅項目就要停工，另外有千三個新項目亦都冇辦法展開，而整體撥款覆蓋面好大，當中有大量同民生有關嘅工程。

此外，佢仲鬧爆工務小組喺今個立法年度中，唔計選正副主席就開咗七次會，通過咗九個項目，但當中有八項都係上一立法年度未處理嘅項目。至於財委會方面，佢就話喺今個立法年度雖然處理咗十二項工程計劃，但全部都係上一立法年度未處理嘅議程。佢希望班議員要以市民福祉為依歸，實事求是咁處理撥款申請，等政府可以快啲展開工程。

有別立會 陳健波盧偉國難剪布

事實上，工務小組最近已經加咗會，但距離四月一日，都只係剩番六次會，順順利利咁開會都未必追得上進度，若果班泛民唔生性，不停拉布嘅話，真係唔知點收科。

財委會都唔好得去邊，雖則陳健波已將修改《會議程序》嘅議程放喺特別財會上處理，但拉鋸咗咁耐，依家先通過修改《會議程序》嘅程序。再加上，聽聞有建制派都覺得修改《會議程序》嘅建議太辣，而且財委會主席同立法會主席職能上有別，冇辦法好狠咁剪布，試問呢個結未解開，又點加快撥款速度呢？不如建制派快啲拆掂先喇！