本年度港府預計又會錄得過千億元盈餘，財政司司長陳茂波日前就講過會「諗諗」係咪再次直接向市民派錢。兩名行政會議成員自由黨嘅張宇人同工聯會嘅黃國健，尋日喺電台雙雙力撐派錢，認為對飲食界同基層市民都有好處。張宇人同黃國健一個代表飲食業同工商界、一個代表勞工界同草根階層，就最低工資、標準工時同強積金對沖等勞資問題拗咗成廿年，今次佢哋罕有聯手逼政府派錢，陳茂波都咪話唔驚！
