政情：羅致光籲借貸讀書棄兼職
勞工及福利局局長羅致光日前以通脹掛鈎債券iBond比喻大專貸款低息，認為學生可以借貸應付學費。佢尋日出席活動時話，因為曾經見過有學生只顧兼職，搞到面青青，又享受唔到校園生活，所以先建議學生可以考慮借貸，直言唔使擔心無力償還。不過佢又自爆讀書時都有做兼職，咁講法，佢嘅建議會唔會冇說服力呢？
稱錯過校園生活「好嘥」
羅致光話見到有啲學生只顧兼職，甚至通宵工作後返學，覺得咁樣會錯過校園生活同埋擴闊人際網絡嘅機會，直言係「好嘥」。佢又話，唔少基層家庭受中國文化影響，擔心借貸就會搞到一身債，其實計過條數就知係還得到嘅。
咁學生係咪唔應該做兼職呢？羅致光就話唔係，只係唔應該太多。佢當年都有兼職，喺讀大學時就為中學生補習數學，收費每小時一百元。以當時嚟講相信收入都相當可觀，唔怪得佢唔使靠借貸都應付到學費喇。
講起大學生活，羅致光就話依家嘅大學生有別於當年，因為依家入咗大學都仲要努力讀書，而佢自己嗰時就好懶，高考都只係用咗一百零三日準備，大學亦只係一年班時稍為用功。羅致光IQ高達一百六十，梗係有偷懶嘅本錢啦。