政情：鼓吹宣誓當吞苦藥 戴啟思當人大釋法冇到

背道而馳 教人違心

前年十月新一屆立法會就職時爆發宣誓風波，多名非建制議員喺宣誓時「玩嘢」或「加料」，其中青年新政游蕙禎同梁頌恆更公然展示港獨旗幟及以「支那」字眼辱華，引發全球華人怒吼。事件最終引發全國人大常委會進行回歸後第五次釋法，訂明包括立法會議員在內嘅指定公職人員，必須莊嚴及真誠地宣誓擁護《基本法》及效忠特區，否則即會喪失有關資格。本港法院其後亦確認有關釋法內容，先後取消咗游梁等六名非建制議員嘅議席。

戴啟思在大律師公會改選前夕，喺最新一期嘅律師會會刊《香港律師》，發表題為「公職人員為何宣誓？」嘅文章，簡述咗英國同香港有關公職人員宣誓嘅法律同歷史，當中提到曾有支持愛爾蘭同北愛爾蘭嘅英國議員，因拒絕宣誓效忠英國君主而無法進身國會。佢又話喺九七回歸前，香港立法局議員有權選擇宣誓效忠香港市民，而非效忠英女王，對《基本法》未有加入有關選項「感到可惜」，否則宣誓風波就應該唔會發生。

戴啟思最後提出，對於一啲對人大釋法感到疑慮嘅人，最恰當做法就係採納約四百年前一位國際律師John Selden嘅建議，即係當宣誓係一粒苦藥咁成粒吞咗佢，唔好咀嚼，否則就會感到苦澀而無法食落肚！戴啟思咁講，即係教人違心宣誓，同人大釋法要求嘅真誠宣誓背道而馳。

有違法治 知法犯法

戴啟思本身係英國人，睇嚟佢亦無意喺香港出任公職，絕對有自由拒絕擁護《基本法》或效忠香港特區。但佢身為一位資深大律師，成日強調要捍衞法治同一國兩制，依家卻公然鼓吹其他人無視《基本法》同人大釋法對宣誓嘅法定要求，又係咪有違法治、甚至知法犯法呢？