中環出更：新正頭打牌大勝 趙式浩全年運暢

Howard解釋，當年打八圈贏廿底係因為其中有「雀友」「互頂」，所以佢就可以漁人得利，而佢嗰年真係全年都過得好順。不過，佢都試過有一年過年時打牌輸咗八底，嗰年運勢真係麻麻哋喇，所以依家過年都唔敢打咁多牌，怕會影響全年運氣喎。

字靚見稱 許曉暉幫手寫揮春

講起過年，民政事務局前副局長許曉暉（Florence）就話，在任時每逢過年都要出席好多活動，冇乜時間陪屋企人，依家「無官一身輕」，終於可以帶住囡囡去拜年，佢仲打算整賀年食品，小朋友一定好開心。雖然比以前少咗出席活動，但都已經有政黨一早約咗佢喺過年時幫手寫揮春，事關Florence出晒名寫得一手好字，佢話有幾個朋友仲早早同佢預訂咗添。

而工聯會理事長吳秋北過年雖然都要出席唔少活動，但佢就話一定會留番啲時間陪下小朋友，帶埋佢哋去拜年，小朋友有得逗利是就最開心喇！講起利是，公務員事務局局長羅智光就話，唔會派利是畀公務員同事，最多買啲糖果等大家開心下，並且只會派利是畀親戚。

羅智光話唔會派利是畀公務員同事。

吳秋北（左）同許曉暉（右）過年都打算陪小朋友。（徐家浩攝）

卓妮