政情：周浩鼎迎第二胎唔敢亂收禮物
立法會議員周浩鼎（Holden）將於今年第一季再做老竇，太太第二胎同長子相差成三、四年，當年張BB床當然已經掉咗，依家正度緊買邊款，因為要就番間房嘅面積，至於奶樽就仲剩番幾個可以重用，但仍有好多BB嘢要買過。
費事又向立會申報
Holden透露，有唔少朋友都想送啲BB嘢畀佢，但佢就唔敢亂收，費事又向立法會申報，情願自己去買。佢自言同太太都唔係緊張大師，一切順其自然，加上有第一胎嘅經驗，因此毋須花太多時間去購物同布置BB房。
Holden又話，自幼與細路一同成長，覺得為長子添個細佬妹係好事，因為可以多個玩伴，並從中學懂分享。問佢係咪「兩個就夠晒數」，佢就話會否生第三個要交由上帝決定，睇嚟佢仲會繼續努力「造人」。