中環出更：羅詠詩愛日本掃貨 排40分鐘等退稅
日本係港人嘅旅遊熱點之一，早前有指日本政府計劃喺今年四月起簡化遊客退稅手續等，早前喺一個活動遇到百仁基金副主席羅詠詩，佢話自己好鍾意去日本買嘢，化妝品特別好用，自己試過買藥妝退稅要排好耐隊，最耐試過排四十分鐘，仲試過排錯隊添！
不過，唔係人人都有咁嘅耐性，好似中華總商會常務會董陳光明話去旅行好少買嘢，問佢退稅方便咗係咪對佢冇乜影響呢？佢就即刻鬼馬笑指「咁我冇講過身邊嘅人啫，咁我身邊嘅人都會買嘅，唔買就呃你啫」，佢話退稅方唔方便，都要視乎機場，例如東京、北海道就特別多人，自己好多時去機場都預到時間啱啱好，見到太多人就唔排隊放棄算。
陳國基頂唔順日日食生嘢
除咗退稅，近日有指日本有意喺明年向所有離境人士收取一千日圓（約七十港元）嘅離境稅，七十港元對政商界人士絕對唔算得係大數目，但政商人士都關注對旅遊業嘅影響。特首辦主任陳國基講笑話，加到七百港元、七千港元仲好，咁就多啲人嚟香港。對於日本旅遊，佢話明白日本乾淨同嘢食好味，女仔會鍾意去，但日日食生嘢，自己就會「頂唔順」，自己去旅行最大考慮係有冇假期。
林顥伊話北海道啲雪好靚
香港梅州聯會會長余鵬春就相信離境稅影響唔大，香港離境稅仲高，又要收機場建設費，但佢認為，為咗興建三跑都係值得嘅，如果冇三跑就唔使同周邊嘅機場競爭，例如廣州白雲機場都發展得好厲害。
鍾意運動嘅經民聯青年事務委員會副主席林顥伊就講起北海道啲雪特別靚，原來佢約十歲開始學滑雪，若有時間，每年冬天都盡量去一個落雪嘅地方滑雪。
卓妮