政情：馬斐森本月離任 近九成教職員狠批表現

港大教師及職員會於上月十八日至本月二日進行訪問，就馬斐森任內管理、與教職員溝通、推動港大發展幾方面了解教職員嘅意見，調查發現，除咗八成六受訪者非常不同意或不同意馬斐森能達到問責標準，近九成仲話佢未能保護校內「吹哨者」，維護研究誠信。

被指港大歷來最差校長

張星煒炮轟馬斐森提早辭職另謀高就極之唔負責任，「教壞學生」，形容馬斐森不論對外對內表現都一團糟，「我喺港大做咗廿幾年，佢（馬斐森）係最差嘅校長」。

另外，中文大學新任校長段崇智尋日會見傳媒時，被問及大學校園能否討論港獨，佢話大學已有明確措施處理，並會捍衞學術同言論自由，希望大家以和平同理性嘅方式討論。