政情：陸頌雄嘲九巴「燒賣加蟹子」扮豪華
立法會議員陸頌雄尋日出席一個電台節目時批評九巴收費貴，究竟發生乜嘢事呢？原來九巴近日向運輸署提交咗兩個建議，想開辦兩條分別由元朗同屯門往來灣仔嘅「豪華巴士」線，仲話車費要比普通線貴五成，即大約三十五同三十一蚊，淨係睇價錢真係幾貴喎，但係服務又有乜唔同先？
斥豪華巴士收費加幅太高
據九巴嘅建議指豪華巴士冇企位，座位會整闊啲，同埋有USB充電同無線上網，睇落就唔算新穎，但陸頌雄都好唔滿意，話呢啲設備好多新型巴士都有，形容九巴今次係「燒賣加粒蟹子」就叫「豪華燒賣」，然後乘機加價五成，仲話呢啲服務最多加價一成至兩成，批評加五成係難以接受。
至於網民方面就毀譽參半，有啲市民話開多兩條線就多啲選擇，而且香港係自由市場，嫌貴可以選擇唔搭，只要對本身嘅路線同班次冇影響，多兩條線就絕對係有益冇害。但另一邊廂就話呢個建議根本係以繁忙時段嘅上班族為目標，逼市民喺趕時間嘅時候「焗搭」，仲擔心豪華巴士會逐漸取代普通巴士，變成一定要「搭貴巴」。