政情：梁榮武話當年 做天氣先生一腳踢
睇電視天氣報告通常都有報道員向觀眾報道天氣情況，第一代天氣先生梁榮武就話，佢當年只有一間電視台願意採用專業氣象報道員報道天氣，所以當時已經係創舉。佢又話，當年電視台工作人員會各司其職，每人喺節目中擔任唔同崗位，但作為氣象報道員嘅佢，就由搜集資料、撰寫講稿至調整鏡頭角度都自己搞掂，可以話係「One Man Band（一腳踢）」。
原本係科學主任嘅梁榮武一九八五年突然身負重任，要以專業氣象報道員姿態拍攝報天氣實驗片，最終有一間電視台採納，總算成功入屋。佢話，由於到電視台報天氣係「工作以外嘅工作」，所以每月都可獲得額外約八百元嘅酬勞，待遇相當唔錯o架。
楊威龍錄影試過蝦碌七次
轉眼三十年，現時新進天氣報道員楊威龍就坦言，曾試過錄影時蝦碌七次先成功，緊張到出晒手汗。佢又話，會選擇同大眾息息相關嘅資訊，報道時亦要有感情，先可以將氣象資訊及知識傳遞畀觀眾咁話。