工業界立法會議員梁君彥當選為立法會主席之後，就一度因為身兼十八間公司嘅受薪董事而備受質疑，擔心佢因為涉及業務眾多而有利益衝突。而佢更因為涉嫌向秘書處漏報持有兩間公司股份，被投訴至議員個人利益監察委員會。梁君彥事後都話「經一事、長一智」，仲對自己嘅疏忽致歉。唔知係咪因為怕再引起爭議，佢呢幾個月就陰啲陰啲咁辭任多間公司受薪董事職位，其中日前就再辭去大新銀行同大新銀行集團嘅職位，但就新申報擔任大新金融集團非執董，咁樣佢究竟係增磅定減磅呢？
