政情：歡送派對 張偉麟「糕」呼退而不休
醫管局聯網服務總監張偉麟退休離任，尋日趁最後一日返工切蛋糕搞歡送派對。自從傳出退休消息之後，大家最關心佢嘅去向，不過佢就成日將「退而不休」掛在嘴邊，就連尋日蛋糕上嘅裝飾牌，都寫上「退而不休」四隻大字，真係搞笑。相信佢心裏已有晒打算。
有人招手搞保險會考慮
咁究竟佢會做乜嘢性質嘅工作？佢繼續玩神秘，話總之會繼續令社會「make a difference」。隨後佢特別提到當前香港自願醫保、醫療融資等方面嘅發展面對挑戰，唔通暗示想轉行去幫手搞吓保險？張偉麟就笑言，如果有人向佢招手，都會認真考慮。
作為醫管局高層，每當有醫療事故或社會關注嘅議題，都要面對傳媒嘅追問，佢就笑稱從未驚過，以一敵十都無有怕喎。