政情：袁海文處理美容投訴 變「脫毛專家」

袁海文笑言當初主打美容「路線」，係因為做區議員後擺街站接觸嘅第一單求助個案，就係涉及學生妹投訴美容院。佢話好多美容療程被投訴，激光脫毛就特別多，但係脫毛往往涉及女性敏感部位，所以開頭講起時都覺得尷尬。但隨着個案愈來愈多，佢依家都冇晒尷尬感覺喇，仲講笑話依家畀佢望一望美容院嘅地址，佢就講得出係邊間美容公司。

大呻未有固定議辦

不過袁海文至今仍未有議員辦事處，佢話雖然後生一輩以電話同社交網站平台等都可以搵到佢，但對服務長者嚟講，都係有個固定議辦方便啲。可惜佢喺荔枝角道天橋底設貨櫃議辦嘅申請，至今仍未獲民政署批准，佢話再咁拖落去，就要去申訴專員公署投訴喎。