政情：打理百萬畝農地樹根內蒙做薯王
立法會前議員鍾樹根早兩年先後失去區議會及立法會議席，可以話「雙失」中年人士。樹根人面廣，初初由種番薯開始，估唔到務農版圖愈搞愈大，最近就喺內蒙古打理一百萬畝農地，即係差唔多有五百二十六個維園咁大嘅地方，用來種薯仔，變身做「薯仔大王」。為咗不斷擴大「樹根務農版圖」，佢單係今年都飛咗七十次，平均五日就要出差一次，看來樹根立定決心衝出議會、衝出香港，勇闖神州大地，建立種植王國。
農務版圖遍大江南北
樹根去年卸下議會工作後就已經去了海南搞種番薯生意，嗰陣未習慣要日曬雨淋，搞到皮膚又黑又乾，要即刻做美容急救。後來樹根再去哈爾濱種大米，又去過武夷山睇種植名茶大紅袍、去大連視察水產、最近又去山西省視察小米種植情況，可以話大江南北都有「根影」！樹根透露，現時嘅「樹根務農版圖」已經擴展到鄭州及內蒙古，鄭州主要係種蔬果，內蒙就種草畀牛羊食，仲有種薯仔。
今年飛咗70次傾生意
樹根話，內蒙多沙質土，而且唔係太肥沃，啱晒種薯仔，加上嗰度地大人少，佢個客就已經有一百萬畝農地可以種薯仔，只要唔好有太多天災，農民收穫就應該幾好，最快到明年農曆新年後就會有收成，到時應該睇到個成果。樹根數數手指，話今年應該飛咗七十次喇，仲慨嘆公司唔夠人，次次都要親自飛去傾生意同做推廣，嚟緊下月又要再出發去湛江。樹根以前處理開地區事務，幫街坊拆掂啲奇難雜症，依家齋搞種植就更加「肯肯定」冇問題啦！
樹根在任議員期間嘅一言一行都備受關注，更被封為「立法會金句王」，而且更有唔少政界人士受到其感染出現「樹根化」迹象！唔少網民都好掛住樹根嘅金句，更有人默默地為佢集成「鍾式」金句語錄，無論係創新四字成語「雞毛鴨蒜」、「子烏虛有」，抑或「same on you（shame on you）」，甚至係「You are 『尖明』（Dreaming） on（in）your office」，每次講起都會令人會心微笑，憶起有樹根嘅日子，唔知樹根務農又會唔會再被人惡搞呢？