中環出更：黃碧雲大棠賞紅葉 笑人多似拜山
元朗大棠紅葉每年都吸引到唔少人去欣賞，今年立法會議員黃碧雲（一舊雲）都唔執輸，喺聖誕假拉埋老公同親朋戚友一齊去賞紅葉。不過第一次去大棠嘅一舊雲就話，冇諗過會有咁多人上山，好似去咗旺角咁，仲話同掃墓上山一樣咁多人喎。真係噏得就噏，大吉利是！
覺得交通配套可改善吓
一舊雲話，其實以前佢都諗過去大棠睇紅葉o架喇，但係次次諗到好多人就作罷，今年個個都同佢講啲紅葉好紅，所以都忍唔住抽時間去睇吓。
佢又話，嗰日佢哋係自己揸車去大棠，點知遇到警察封路，話該處公眾停車場已滿，所以佢就只好泊喺山下一個私人停車場。一舊雲仲話，估計嗰個私人停車場泊咗一千幾百架車，每架都收八十元，直言嗰個停車場真係「發過豬頭」。
終於睇到大棠紅葉，一舊雲都話的確係幾靚。但被問到同外國嘅紅葉比邊度靚啲，佢就話，如果係同加拿大比較嘅話，就真係「蚊髀同牛髀」喇，但係因為香港少見，所以都算係OK嘅。不過佢就覺得，大棠唔夠巴士，而且又唔夠泊車位，政府應該改善吓啲交通配套喎。
卓妮