中環出更：名人教路買有機食品防受騙
年輕一代愈嚟愈注重健康，有機食品都喺本港大行其道，不過近年多咗冒充有機嘅食品，想健康都要識得揀。早前喺一個晚宴上見到一班年輕名人父母，講起有機食品個個都相當有心得。香港青年聯會主席郭永亮（Andy）話，上網買有機食品就最易被人呃。中西區區議員楊哲安嘅太太楊張新悅就教大家買有機食品，話睇到啲菜一巖一巉，就知係有機喎！
Andy話，太太都會買有機食品畀小朋友食，但一定要睇吓來源，例如一隻聲稱係有機嘅雞，可能佢食嘅飼料並非有機，所以認證好重要，上網買不明來歷嘅有機食品就最易被呃，容易有黑心食品，即使係真正嘅有機食品，都可能會被改有效日期。佢太太平時會同朋友交流心得，睇去邊間舖頭買會穩陣啲。
最緊要問店員
楊張新悅就話，依家有機產品多數有晒證書，提防買錯有機產品最緊要係同店員傾多幾句，識咩係有機食品嘅店員會解釋啲嘢點樣有機，有機嘅係邊部分。所以佢唔係好鍾意去超市買，因為店員都未必識得晒。做有機食品生意嘅香港中華廠商聯合會青年委員會副主席黃浩鈞話，最近有機牛油果不時賣到冇貨，可見港人有幾熱衷買有機嘢。
講番當晚係自由黨青年團周年晚宴，青年團前主席、運輸及房屋局局長政治助理符傳富同埋財經事務及庫務局副局長陳浩濂亦有到場。青年團副主席林偉文特別邀請兩位同名同姓嘅政界人士出席，一位係港九藥房總商會理事長，另一位係測量師，真係搞笑。
卓妮