中環出更：民主派反對縮投票時間 建制派：唔強人所難
政府就檢討選舉安排嘅諮詢今日屆滿，民主派繼續狙擊縮短投票時間嘅建議，其中民主派會議召集人、立法會資訊科技界議員莫乃光（Charles）星期三喺網上發起反對活動，佢尋日接受查詢時話唔夠一日已收到五千份反對信件，並全部轉寄至政府。而截至尋日中午十二點，政制及內地事務局一共收到約四千五百份意見書。
黃國健批非建制「賴地硬」
Charles批評政府諮詢嘅宣傳放軟手腳，唔少市民唔知道有今次諮詢。佢又指近年立法會選舉投票率只有約五成，批評當局仲要縮減投票時間，做法係「開倒車」，質疑建議背後有政治目的，想打擊民主派嘅選舉策略。民主黨胡志偉就指，利用科技同人手安排已可改善票站職員嘅工作量，炮轟當局嘅建議唔合理，明言絕唔會支持。
另一邊廂，建制派雖然支持縮短投票時間，但就講明唔會「強人所難」。身兼行政會議成員、立法會議員嘅張國鈞話睇唔到建議有政治考慮，又指真正嘅選民會喺提早結束前去投票，但佢所屬嘅政黨對建議無乜強烈意見，話唔改都可以，唔想予人「霸王硬上弓」嘅感覺。同為行會成員嘅工聯會議員黃國健就批評非建制派「賴地硬」，唔認同提前一個鐘結束會嚴重影響選情。
卓妮