政情：今日你上鏡：象哥「焗住」扮聖誕老人
下個禮拜一就係聖誕節，民建聯多名議員同管理層，尋日喺立法會搞咗個聖誕派對，大家唔使諗都估到，梗係由最夠噸位嘅「象哥」黃定光扮聖誕老人喇！
不過班黨友又冇事先準備好道具，最後求其搵咗件斗篷畀佢扮鬍鬚，連個鼻都包實埋，變咗蒙面老人，令人擔心患過睡眠窒息症嘅象哥會焗親。
周浩鼎明年變兩孩之父
派對期間傳來一個好消息，該黨議員周浩鼎（Holden）第二個小朋友，預計會喺明年首季出世！Holden依家已有一位三歲大嘅囝囝，至於第二個係仔定女，佢就話依家唔講住，總之多個細佬妹陪哥哥玩，就一定開心同熱鬧啲。