俗稱「公民廣場」嘅政府總部東翼前地廣場重開有期！有消息話，政府打算喺聖誕假期後至元旦前重開公民廣場，據知政府內部已經通知保安檢查所有設施，為重開廣場做好準備。此外，早前有市民喺立法會外紮營反對修改《議事規則》，地政總署日前亦已張貼告示，要求相關人士喺今日前清走所有營幕，疑為配合廣場重開。
二○一四年七月政府以「改善政府總部保安及基建設施」為由，喺公民廣場外興建鐵欄兼有限度開放。同年九月，「雙學三子」香港眾志秘書長黃之鋒、主席羅冠聰及學聯前秘書長周永康就帶領衝擊公民廣場，觸發為期七十九日嘅違法佔領行動，令金鐘及中上環一帶交通全面癱瘓，最終政府以保安為由封閉廣場至今。
事隔三年，過去民主派不時重提要求重開廣場，到今年四月連建制派都話可以考慮重開廣場，而特首林鄭月娥就在十月公布首份《施政報告》時表明今年底會重開廣場。不過，其後就迎來立法會修改《議事規則》大戰，至上周先成功「剪布」，連同七月一日回歸二十周年、國家領導人訪港等，可謂所有「敏感時刻」已經捱過，如果冇節外生枝，廣場應該可如期重開。