政情：傳下周離任 袁國強續封口
盛傳律政司司長袁國強即將離任，有消息更指係做到本月三十一日，但嗰日係星期日，即係好可能佢返工返到下周六甚至周五就走得。無論正式喺邊日走，袁國強尋日到立法會出席司法及法律事務委員會會議，都應該係佢最後一次以司長身份現身立法會。
喺會議開始前同結束後，都有記者追問袁國強幾時離任？係咪已經搞咗幾個歡送會？佢繼續拒絕證實有關消息，剩係話現階段冇補充，要等佢完成需要做嘅工作之後，先可以公布更多消息。
黎智英等佔中搞手仍逍遙
袁國強出任司長至今約五年半，表現令人失望，並遺留大量工作畀下手執手尾，包括高鐵一地兩檢本地立法、《國歌法》等。當中最離譜嘅係，違法佔領行動爆發至今已有三年多，到最近與佔中相關嘅衝擊政總案、佔旺藐視法庭案、七警案、朱經緯案、以至喺佔領後先發生嘅旺暴案，都已經陸續宣判同結案，唯獨係曾經被警方預約拘捕嘅四十八名佔中搞手，至今只有九人被檢控。被指係佔中「幕後黑手」兼「最大金主」壹傳媒黎智英，到袁國強離任前夕仍舊逍遙法外，真係好不負責任。