政情：陳肇始唔會勸議員戒煙
吸煙與健康委員會早前建議將煙稅增加百分之一百，希望降低吸煙率，目標係喺二○二七年實施全面禁煙。食物及衞生局局長陳肇始未加入政府前，都曾經做過有關吸煙與健康嘅研究，相當關注控煙工作，不過佢早前出席一個籌款晚宴時就話，唔會勸有吸煙習慣嘅立法會議員戒煙喎。究竟點解？陳肇始就解釋，因為其他人話佢哋食煙，唔代表對方真係有食煙習慣，但係佢都好歡迎吸煙人士使用衞生署嘅戒煙服務咁話。
指誘因對戒煙者好重要
陳肇始又話，自己以往都接觸過唔少吸煙人士，發現戒煙容易與否真係因人而異，有啲人就算食咗好多年煙都好快戒到，有啲人就好想戒煙，但係可能煙癮太大，要逾十年先戒得甩。而誘因對戒煙人士真係好重要，例如曾經接觸過一個長者，已經吸煙多年，後來屋企人因為佢食煙而唔畀佢抱孫，結果呢位長者好快就成功戒煙喇。
至於係咪應該加咁多煙稅，陳肇始就話要問番委員會喇，而政府會從教育等方面多管齊下，降低吸煙率。咁香港將來又係咪應該全面禁煙呢？陳肇始就冇正面回應，強調政府會從多方面考慮喎。