政情：范國威造勢靠死撐 拉布失敗當政績
民主派今日就明年三月立法會補選舉行初選論壇，參與新界東初選嘅新民主同盟前立法會議員范國威尋日就先舉行造勢大會，不過就唔見有主流民主派政黨人士出席撐佢。雖然冇主流民主派撐場，范國威依然自我陶醉，話喺上屆立法會做議員時佢有份參與有關「三堆一爐」同高鐵撥款嘅拉布戰，仲話會以此「政績」喺論壇上證明實力。唔通佢唔記得咗呢兩個項目最後都係獲批撥款，拉布失敗都可以當政績？
除此之外，范國威尋日話自己有出任立法會議員嘅經驗，「正經傾又得，拉布我又得」。有幾得要睇選民反應喇。
主流泛民冇人到場
而佢尋日嘅造勢大會，除咗黨內一班區議員嚟撐場外，較為人熟悉嘅就只得香港教育專業人員協會監事會成員韓連山。范國威被問到係咪冇主流民主派支持時，就死撐稱其實有重量級人士同政黨表示支持佢，只係礙於初選公平先至未表態，又話自己有信心取得民主派支持者認同喎。